Jaqynda «Bolashaqqa baǵdar: rýhanı jańǵyrý» baǵdarlamasy aıasynda «Arna-b» baspasynan jaryq kórgen «Shámshi Qaldaıaqov» fotoalbom-kitaby kompozıtor shyǵarmashylyǵyn, ómirin jańa bir qyrynan tanytqandaı.
QR Ulttyq kitaphanasynda ótken kitaptyń tusaýkeserine jınalǵan qaýym Shámshi ómirinen syr shertti. Jobanyń avtory kompozıtor shyǵarmashylyǵyn zertteýshi, kompozıtor Q.Qurmanáli fotoalbomnyń tarıhynan birqatar derekterdi ortaǵa saldy. Al memleket jáne qoǵam qaıratkeri A.Tshanov, QR UǴA akademıgi, f.ǵ.d. О́.Aıtbaıuly, jazýshy-pýblısıst Q.Sársenbaı, belgili satırık K.Ámirbek, a.sh.ǵ. doktory, professor A.Asanov, «Arna-b» baspasynyń dırektory B.Oısa, t.b. kompozıtor týraly estelikterdi ortaǵa saldy.
Aýqymdy jınaq jeti bólimge jiktelipti. «Meniń Qazaqstanym» dep atalatyn alǵashqy bólim kompozıtordyń otanǵa degen súıispenshiligi, týǵan ólke týraly ánderine arnalǵan. Al ekinshi bólim - «О́mir-ózen». Bólimde kompozıtor ómiriniń ár kezeńderin qamtyǵan fotoshejireler bar. «Sol bir kez esimde...» dep atalatyn bólimde kompozıtor týraly estelikter jınaqtalsa, ary qaraı jalǵasyn tapqan «Shámshiniń áni»,«Sarǵaıǵan sýretter syry», «Amanat», «Shámshi-mura» bólimderinde oqyrmanyn beı-jaı qaldyrmaıtyn áserli kezder toptastyrylǵan.
Kesh sońynda S.Qalymov, T.Áshimbekova, E.Ospan «Án aǵa», «Syǵan serenadasy» ánderin shyrqap, kópshilikti ásem áýezge bóledi.
Elvıra SERIKQYZY,
«Egemen Qazaqstan»
Almaty
